Aprelin 21-də Misirin İsgəndəriyyə şəhərində 10-cu “Miss Eco International” gözəllik və ekoloji maarifləndirmə müsabiqəsi keçirilib. Tədbirə dünyanın müxtəlif ölkələrindən 60 iştirakçı qatılıb.

AZƏRTAC xəbər verir ki, builki müsabiqə ətraf mühitin və bioloji müxtəlifliyin qorunmasının vacibliyinə dair qlobal mesaj vermək məqsədilə keçirilib və bunun dayanıqlı turizm inkişafı ilə sıx bağlı olduğu vurğulanıb. Tədbirin açılışında dünyada ekologiyanın qorunması üçün müxtəlif tədbirlərin keçirildiyi və COP konfranslarının əhəmiyyəti qeyd olunub. Ötən il Bakıda baş tutmuş COP29 konfransının ətraf mühit problemlərinə diqqətin cəlb edilməsi üçün mühüm tədbir olduğu bildirilib.

Tədbirdə iştirak edən Azərbaycan səfiri Elxan Poluxov yerli mediaya müsahibəsində COP29 konfransı və onun nəticələri barədə danışıb, dövlətimizin ekoloji məsələlərə diqqət göstərdiyini və bu sahədə əhəmiyyətli tədbirlər həyata keçirdiyini vurğulayıb.

Tədbirin təşkilatçıları bildiriblər ki, müsabiqə çərçivəsində keçirilən tədbirlər zamanı nadir təbii sərvətlərin - mərcan rifləri, manqrov meşələri, vəhşi heyvanlar, eləcə də Misirin Vadi əl-Camal qoruğunda yerləşən unikal geoloji quruluşlu abidələrin qorunmasının vacibliyi xüsusi vurğulanıb.

Müsabiqənin təsisçisi və münsiflər heyətinin sədri doktor Əmal Rızq bildirib ki, builki iştirakçılar təkrar emal olunmuş materiallardan hazırlanmış geyimlərin dizaynı və təqdimatında bir-biri ilə yarışıblar. Onun sözlərinə görə, bu təşəbbüsün əsas məqsədi ətraf mühitin qorunmasında təkrar emalın əhəmiyyətinə diqqət çəkməkdir. O, həmçinin qeyd edib ki, layihə tədbir iştirakçıları tərəfindən böyük maraqla qarşılanıb. “Əgər tullantılardan gözəllik yarada bilsək, bu, ətraf mühitə nəfəs almaq üçün yeni bir fürsət deməkdir”, - deyə Əmal Rızq vurğulayıb.

Müsabiqə müddətində müxtəlif mədəni və əyləncəli proqramlarla yanaşı, iştirakçıların milli geyimlərinin nümayişi, istedadlarını və ümumi dünyagörüşlərini sərgilədikləri mərhələlər, həmçinin axşam geyimi yarışları keçirilib.

Müsabiqənin münsiflər heyətində Misirin tanınmış dizaynerləri, kino və media nümayəndələri, eləcə də yeganə beynəlxalq ekspert kimi azərbaycanlı fashion dizayner Zəhra Poluxova yer alıb. O, ölkəmizi beynəlxalq münsif kürsüsündə uğurla təmsil edib. Onun bu sahədə artıq xeyli təcrübəsi var. Zəhra Poluxova ötən il “Miss Eco Teen International” və “Top Model of Azerbaijan 2024” kimi nüfuzlu moda layihələrində də iştirak edib. Gənc yaşına baxmayaraq, onun dizayn etdiyi geyimlər həm özü, həm də Türkiyə və Misirin tanınmış müğənniləri və moda ustaları tərəfindən istifadə olunub və yüksək qiymətləndirilib.

Bu ilin qalibi filippinli model Aleksiye Kaimos Bruks olub. O, tacı keçən ilin qalibi - ukraynalı model Angelina Usanovadan qəbul edib.