Musiqili Teatrın aktyoru ustad dərsləri keçəcək
Azərbaycan Dövlət Akademik Musiqili Teatrının tanınmış aktyoru, Xalq artisti Pərviz Məmmədrzayev aprel ayının 14-dən 18-dək Füzuli Dövlət Dram Teatrında ustad dərsləri keçəcək.
Magazinews.az xəbər verir ki, Azərbaycan Respublikası Mədəniyyət Nazirliyinin “Öyrədərək öyrənirəm” adlı layihəsi çərçivəsində beş gün davam edəcək dərslərdə Xalq artisti peşəkar və gənc aktyorlarla görüşəcək, həmçinin onlara xüsusi proqram əsasında təlimatlar verəcək.
Pərviz Məmmədrzayev dərslərin ilk günü təlim iştirakçılarına diqqət və yaddaşa, duyğu üzvlərinə aid məşqlər keçəcək. Növbəti günlərdə isə “Hərəkətin xarakterinin və mənasının zaman və məkan aspektindən açılması”, “Aktyorun tərəf müqabilinə uyğunlaşması və onunla səhnədə canlı şəkildə işləyə bilməsi”, “Bədənin ifadə vasitələrinin inkişafı”, “Bədən üzvlərinə aid çalışma, etüdlər”, “Hərəkət və sözlə bağlı improvizasiya”, “Mətn üzərində iş formaları”, “M.Çexovun “Ağırlıq mərkəzi” və “Psixoloji jest” anlayışları barədə” təlimlər keçəcək, uzun illər səhnədə qazandığı təcrübəsini teatrın bütün yaradıcı heyəti ilə bölüşəcək.