“Musiqili Teatr 109-cu mövsümünə “O olmasın, bu olsun”-la başlayacaq”

Azərbaycan Dövlət Musiqili Teatrı 109-cu teatr mövsümünə 20 sentyabr saat 19:00-da "Heydər Əliyev Fondu"-nun və "Mədəniyyət Nazirliyi"-nin təşkil etdiyi Üzeyir Hacıbəyliyə həsr olunmuş "X Beynəlxalq Musiqi Festivalı" çərçivəsində “O olmasın, bu olsun” tamaşası ilə start verəcək.

Magazinews.az-ın məlumatına görə Musiqili Teatrın mətbuat katibi Fəridə Aslanova bildirib ki, açılış mərasimində bu ölməz əsər xalq artisti, “Şöhrət” ordenli, milyonların sevimli gülüş ustası Afaq Bəşirqızının (Sənəm) və əməkdar artist, Prezident mükafatçısı, “Zirvə” mükafatı laureatı Şövqi Hüseynovun (Məşədi İbad) iştirakı ilə təqdim ediləcək.

Sentyabrın 22-də “Arşın mal alan” (Ü.Hacıbəyli), 23-də “Nuri-didə Ceyhun” (Əli Əmirli) tamaşaları nümayiş olunacaq.

Teatr kollektivi sentyabr ayının sonuncu həftəsonu, 28-də “Ər və arvad” (Ü.Hacıbəyli), 29-da “Mən dəyərəm min cavana” (F.Sücəddinov, T.Vəliyeva), 30-da “Bankir adaxlı” (E.Sabitoğlu, T.Vəliyeva) səhnə əsərləri ilə teatrsevərlərin görüşünə gələcək.

Tamaşalar axşam saat 19:00-da başlayacaq.

Azərbaycan Dövlət Musiqili Teatrı günlərini yaddaqalan keçirmək istəyən hər kəsi bir-birindən maraqlı tamaşalara baxmağa dəvət edir.

Qeyd edək ki, teatrsevərlər 6 manatdan başlayan biletləri şəhərin bütün teatr-konsert salonları kassalarından, "ASAN Xidmət” mərkəzlərindən və iticket.az saytından əldə edə bilərlər.