"Türkiyəyə getmək səbəbim anam Nəsibə Zeynalovanın xəstəliyi ilə bağlı idi. İllər əvvəl mənə söylədilər ki, Cahangir bəy, sizin Türkiyəyə getməyiniz hamımızı çaşdırdı. Ya sən, ya Nəsibə xanımın açmayacağı qapı yox idi. O zamanlar elə bir nazir yox idi ki, mənə nədəsə köməklik etməsin. Onlar ən uzağı deyirdilər ki, sabah saat 11-də gəl görüşək. Mən də heç zaman hansısa xahişi özüm üçün istəməzdim. Özüm üçün həyatda heç zaman heç nə istəməmişəm".

Bu sözləri Əməkdar incəsənət xadimi Cahangir Zeynallı "Söhbət var" verilişində deyib. O, anası, mərhum Xalq artisti Nəsibə Zeynalovadan bəhs edib:

"Nəsibə xanım mənim üçün iki dəfə nazirin yanına xahişə gedib: Bir mən əsgər getmək istəyəndə, noyabra kimi gözləmək istəmədim. Murtuz Quliyevin yanına getdik. Nəsibə xanım dedi ki, mən istəyirəm oğlum indi getsin əsgər. Oradan da Murtuz müəllim dedi ki, kimdir o? Necə insandır ki, Nəsibə xanım övladını əsgər göndərmək istəyir? İkinci dəfə isə anam Zakir Nərimanovun yanına getdi ki, oğlum Cahangir Musiqili Teatrda işləmək istəmir. O, Şəkiyə getmək istəyir. Yəni təyinatımı Şəkiyə istəyib. Başqa məsələdən ötrü mənim üçün xahiş olunmayıb. Özüm üçün də heç nə xahiş etməmişəm".

C.Zeynallı Türkiyəyə köçməsinin səbəbini açıqlayıb:

"Anam Nəsibə xanım atamın vəfatından sonra iflic olmuşdu. O, böyük stress keçirmişdi. Onu atamdan sonra 10 il yaşada bildim. Onun dərmanlarını və yaşamını qarşılamaq üçün Türkiyəyə yollandım. Açığı deyim ki, həyat yoldaşımla Türkiyədə 3-5 il arasında yaşamağa getmişdik. Amma getdim, işlər dəyişdi". /axsam.az/